బాలల హక్కుల పరిరక్షణ ప్రతి ఒక్కరి బాధ్యత

నిర్మల్ అక్టోబర్ 31 సాక్షర ప్రతినిధి
బాలల హక్కులను పరిరక్షించడంతో పాటు, వారిపై జరిగే లైంగిక నేరాలు, వేధింపులను అరికట్టేందుకు ప్రతి ఒక్కరూ బాధ్యతాయుతంగా కృషి చేయాలని సురక్షిత్ బచ్పన్ అభియాన్ కార్యక్రమంలో పిలుపునిచ్చారు. బాలలకు భయం లేని, సురక్షితమైన వాతావరణాన్ని కల్పించడం సమాజంలోని ప్రతి ఒక్కరి బాధ్యత అని పేర్కొన్నారు.
జిల్లా న్యాయ సేవాధికార సంస్థ, నిర్మల్ ఆధ్వర్యంలో శనివారం సోన్ మండలంలోని జెడ్పీహెచ్ఎస్ పాఠశాలలో సురక్షిత్ బచ్పన్ అభియాన్ కార్యక్రమాన్ని నిర్వహించారు. ఈ సందర్భంగా బాలల హక్కుల పరిరక్షణ, బాలలపై లైంగిక నేరాల నిరోధం, బాల్యవివాహాల నిర్మూలన, పిల్లలకు సురక్షితమైన వాతావరణం కల్పించడం వంటి అంశాలపై విద్యార్థులకు అవగాహన కల్పించారు.ఈ సందర్భంగా ప్రసంగించిన న్యాయమూర్తి బి. నిఖిత మాట్లాడుతూ, బాలలపై జరిగే లైంగిక నేరాలను అరికట్టడంలో పోక్సో చట్టం–2012 ఎంతో కీలకమని వివరించారు. పిల్లలపై ఏదైనా నేరం లేదా వేధింపులు జరిగినట్లు తెలిసిన వెంటనే సంబంధిత అధికారులకు సమాచారం అందించాలని సూచించారు. బాధిత పిల్లల వివరాలను గోప్యంగా ఉంచడంతో పాటు, వారికి అవసరమైన రక్షణ, కౌన్సెలింగ్, న్యాయ సహాయం అందించాల్సిన అవసరం ఉందన్నారు.
బాలల సమస్యలను గుర్తించినప్పుడు నిర్లక్ష్యం చేయకుండా సంబంధిత శాఖల అధికారులకు తెలియజేయాలని, బాలల భద్రత విషయంలో అన్ని శాఖలు సమన్వయంతో పనిచేయాలని సూచించారు.
ప్రతి బాలుడు, బాలిక భయం లేకుండా, వేధింపులకు దూరంగా, గౌరవంగా జీవించే సమాజ నిర్మాణమే ఈ కార్యక్రమం ప్రధాన లక్ష్యమని తెలిపారు.
ఈ కార్యక్రమంలో రెండో అదనపు జ్యుడీషియల్ ఫస్ట్ క్లాస్ మెజిస్ట్రేట్ బి. నిఖిత, సోన్ ఎస్ఐ కె. గోపి, వివిధ శాఖల ప్రతినిధులు, పాఠశాల ఉపాధ్యాయులు, ఉపాధ్యాయినులు తదితరులు పాల్గొన్నారు.