ముధోల్ ప్రభుత్వ ఆసుపత్రికి మహర్దశ.. మౌలిక వసతుల కల్పనకు చర్యలు

నిర్మల్ నవంబర్ 3 (సాక్షర ప్రతినిధి) ముధోల్ ప్రభుత్వ సామాజిక ఆరోగ్య కేంద్రంలో వైద్య సేవలను మరింత మెరుగుపరిచి, రోగులకు మెరుగైన వైద్య సదుపాయాలు కల్పించేందుకు అవసరమైన చర్యలు తీసుకుంటామని జిల్లా కలెక్టర్ భవేశ్ మిశ్రా తెలిపారు. ప్రభుత్వ ఆసుపత్రులకు వచ్చే పేద, సామాన్య ప్రజలకు నాణ్యమైన వైద్యం అందించడమే లక్ష్యంగా మౌలిక వసతులను అభివృద్ధి చేస్తామని పేర్కొన్నారు.అనంతరం రక్త పరీక్షల విభాగం, మందుల పంపిణీ కేంద్రం తదితర విభాగాలను పరిశీలించారు. ఆసుపత్రికి వచ్చే ప్రతి రోగికి నాణ్యమైన వైద్య సేవలు అందించాలని వైద్యులు, సిబ్బందికి సూచించారు. రోగులకు ఎలాంటి ఇబ్బందులు కలగకుండా అవసరమైన మందులు, వైద్య సేవలు అందుబాటులో ఉంచాలని ఆదేశించారు.
ఆసుపత్రి భవనం పాతదైన నేపథ్యంలో అవసరమైన మరమ్మతులు చేపట్టడంతో పాటు మౌలిక సదుపాయాల కల్పనకు ప్రాధాన్యత ఇస్తామని కలెక్టర్ తెలిపారు. ఆసుపత్రిలో మార్చురీ ఏర్పాటు చేసేందుకు చర్యలు తీసుకుంటామని, నూతన ఆసుపత్రి భవన నిర్మాణానికి సంబంధించి ఉన్నతాధికారులతో సంప్రదించి అవసరమైన ప్రతిపాదనలు, చర్యలు చేపడతామని వెల్లడించారు.
ఈ కార్యక్రమంలో డీసీహెచ్‌ఎస్ కాశీనాథ్, తహసీల్దార్ శ్రీలత, సర్పంచ్ షబానా బేగం, ఇతర అధికారులు, వైద్యులు, ఆసుపత్రి సిబ్బంది పాల్గొన్నారు.