31 గిన్నిస్ ప్రపంచ రికార్డులతో చరిత్ర సృష్టించిన గీతం పూర్వ విద్యార్థిని

హైదరాబాద్: గీతం డీమ్డ్ విశ్వవిద్యాలయం హైదరాబాద్ క్యాంపస్‌లోని స్కూల్ ఆఫ్ టెక్నాలజీకి చెందిన పూర్వ విద్యార్థిని శివాలి శ్రీవాస్తవ అసాధారణ ఘనత సాధించారు. 2016–2020 బ్యాచ్‌కు చెందిన ఆమె మొత్తం 31 గిన్నిస్ ప్రపంచ రికార్డులతో చరిత్ర సృష్టించినట్లు ఆదివారం విడుదల చేసిన ప్రకటనలో విశ్వవిద్యాలయ వర్గాలు వెల్లడించాయి. శివాలి తన తల్లిదండ్రులు కవితా శ్రీవాస్తవ, అనిల్ శ్రీవాస్తవలతో కలిసి ఇటీవల మరో గిన్నిస్ ప్రపంచ రికార్డును అధికారికంగా అందుకున్నారు. చేతితో తయారు చేసిన 3,000 కాగితపు బొమ్మల అతిపెద్ద ప్రదర్శనకు సంబంధించి ఈ రికార్డు సాధించారు. దీంతో వారి కుటుంబం సాధించిన గిన్నిస్ ప్రపంచ రికార్డుల సంఖ్య 31కి చేరింది.
ఒరిగామి, పేపర్ ఆర్ట్‌లో తన అసాధారణ ప్రతిభను చాటుకున్న శివాలి, సృజనాత్మకతకు అంకితభావం, కచ్చితత్వం, పట్టుదలను జోడించి విజయవంతమైన ప్రయాణాన్ని కొనసాగిస్తున్నారు. తన తల్లిదండ్రులతో కలిసి అనేక కాగితపు కళాఖండాలను చేతితో రూపొందిస్తూ కళాత్మక నైపుణ్యానికి అంతర్జాతీయ గుర్తింపు తీసుకొచ్చారు. శ్రీవాస్తవ కుటుంబం సాధించిన విజయాలు కేవలం ప్రపంచ రికార్డులకే పరిమితం కాకుండా సహనం, కఠోర శ్రమ, కళాత్మక అభిరుచి, కుటుంబ సహకారానికి నిదర్శనంగా నిలుస్తున్నాయి. ఈ ప్రయాణం సృజనాత్మక రంగంలో ఆసక్తి ఉన్నవారికి స్ఫూర్తినిస్తోంది. శివాలి శ్రీవాస్తవ సాధించిన ఈ ఘనతపై గీతం విశ్వవిద్యాలయ నాయకత్వం, అధ్యాపకులు, సిబ్బంది, విద్యార్థులు హర్షం వ్యక్తం చేస్తూ ఆమెకు, ఆమె కుటుంబ సభ్యులకు హృదయపూర్వక అభినందనలు తెలిపారు. కళ, ఆవిష్కరణ, సృజనాత్మకత ద్వారా అంతర్జాతీయ స్థాయిలో గుర్తింపు పొందుతున్న శివాలి మరిన్ని విజయాలు సాధించాలని ఆకాంక్షించారు.