పండుగ వేళ మున్సిపల్ కార్మికులకు అండగా జనార్దన్ రెడ్డి

సంగారెడ్డి జిల్లా రామచంద్రపురం మండలం తెల్లాపూర్ డివిజన్ పరిధిలోని కొల్లూరు గ్రామంలో మాజీ వార్డు మెంబర్ జనార్దన్ రెడ్డి ఆధ్వర్యంలో మున్సిపల్ కార్మికులకు చీరలు, ఆర్థిక సహాయం అందజేశారు. గత పది సంవత్సరాలుగా పండుగల సందర్భంగా కార్మికులకు వస్త్రాలు, ఆర్థిక సహాయం అందిస్తూ తన సేవా నిరతిని చాటుకుంటున్నారు. ఈ సందర్భంగా మున్సిపల్ కార్మికులు మాట్లాడుతూ.. గత పదేళ్లుగా జనార్దన్ రెడ్డి పండుగల సమయంలోనే కాకుండా, తన పెళ్లిరోజు సందర్భంగా కూడా తమకు చీరలు, ఆర్థిక సహాయం అందిస్తున్నారని తెలిపారు. తమను గుర్తించి అండగా నిలుస్తున్న ఆయనకు కృతజ్ఞతలు తెలియజేస్తూ, ఎల్లప్పుడూ సుఖసంతోషాలతో, ఆయురారోగ్యాలతో ఉండాలని, మరిన్ని సేవా కార్యక్రమాలు చేపట్టాలని ఆకాంక్షించారు.
మాజీ వార్డు మెంబర్ జనార్దన్ రెడ్డి మాట్లాడుతూ.. తాను వార్డు మెంబర్‌గా ఉన్నప్పటి నుంచి గత పది సంవత్సరాలుగా మున్సిపల్ కార్మికులకు సహాయం అందించడం ఎంతో సంతోషంగా ఉందన్నారు. పారిశుధ్య కార్మికులు చేసే సేవలు ఎంతో విలువైనవని, వారు లేకపోతే పరిసరాలు చెత్తాచెదారంతో నిండిపోతాయని పేర్కొన్నారు. ప్రజల ఆరోగ్యం, పరిసరాల పరిశుభ్రత కోసం నిరంతరం శ్రమించే కార్మికులను ప్రోత్సహించడం ప్రతి ఒక్కరి బాధ్యత అని అన్నారు. భవిష్యత్తులోనూ తన సహాయ సహకారాలు కార్మికులకు ఎల్లప్పుడూ ఉంటాయని, మరిన్ని సేవా కార్యక్రమాలు కొనసాగిస్తానని జనార్దన్ రెడ్డి తెలిపారు.