జాతీయ స్థాయిలో సత్తా చాటిన భారతీనగర్ క్రీడాకారులు

భారతీనగర్: వయస్సు అనేది క్రీడలకు అడ్డంకి కాదని, పట్టుదల, క్రమశిక్షణతో ఏ వయస్సులోనైనా విజయాలు సాధించవచ్చని బీఆర్‌ఎస్ పటాన్‌చెరు నియోజకవర్గ ఇన్‌చార్జ్ వెన్నవరం ఆదర్శ్ రెడ్డి అన్నారు. కోయంబత్తూరులోని నెహ్రూ స్టేడియంలో నిర్వహించిన 5వ వెటరన్స్ స్పోర్ట్స్ అథ్లెటిక్స్ అండ్ గణేష్ నేషనల్ ఛాంపియన్‌షిప్‌లో పతకాలు సాధించి భారతీనగర్ డివిజన్‌కు గర్వకారణంగా నిలిచిన సీనియర్ సిటిజన్లు, ఇతర క్రీడాకారులను ఆయన అభినందించారు. 35 నుంచి 95 సంవత్సరాల వయస్సు గల క్రీడాకారులు పాల్గొన్న ఈ జాతీయ స్థాయి పోటీల్లో పరుగు పందెం, హైజంప్, షాట్‌పుట్, హామర్ త్రో, డిస్కస్ త్రో, వాకింగ్ తదితర విభాగాల్లో తమ ప్రతిభను చాటుకున్నారు.
పతక విజేతల వివరాలు
వెంకట్ రామయ్య (95 సంవత్సరాలు): హామర్ త్రోలో బంగారు పతకం.
శామ్యూల్ (85 సంవత్సరాలు): హామర్ త్రోలో రజత పతకం.
దేవేంద్రా చారి: హామర్ త్రోలో కాంస్య పతకం.
బలయ్య: డిస్కస్ త్రోలో కాంస్య పతకం.
పాటి సత్యనారాయణ: వాకింగ్ విభాగంలో కాంస్య పతకం.
సంధ్య (45 సంవత్సరాలు): షాట్‌పుట్‌లో కాంస్య పతకం.
అదేవిధంగా సీహెచ్ రాములు, స్వర్ణ, బలరాజ్, సరిత తదితరులు ఇతర అథ్లెటిక్స్ విభాగాల్లో పాల్గొని తమ ప్రతిభను ప్రదర్శించారు.
ఈ సందర్భంగా వెన్నవరం ఆదర్శ్ రెడ్డి మాట్లాడుతూ, 95 సంవత్సరాల వయస్సులోనూ వెంకట్ రామయ్య హామర్ త్రోలో బంగారు పతకం సాధించడం ఎంతో స్ఫూర్తిదాయకమని అన్నారు. క్రీడల పట్ల ఆసక్తి, పట్టుదల, క్రమశిక్షణ ఉంటే ఏ వయస్సులోనైనా విజయాలు సాధించవచ్చని పేర్కొన్నారు. జాతీయ స్థాయిలో పతకాలు సాధించి భారతీనగర్ డివిజన్‌కు మంచి పేరు తీసుకొచ్చిన క్రీడాకారులందరికీ అభినందనలు తెలియజేస్తూ, భవిష్యత్తులో మరిన్ని విజయాలు సాధించాలని ఆకాంక్షించారు.