బాంబే కాలనీలో కలుషిత నీటి సమస్యపై క్షేత్రస్థాయి పరిశీలన

రామచంద్రపురం: భారతీనగర్ డివిజన్ పరిధిలోని బాంబే కాలనీలో గత వారం రోజులుగా కలుషిత నీరు సరఫరా అవుతోందని స్థానికులు ఫిర్యాదు చేయడంతో జలమండలి ఎగ్జిక్యూటివ్ డైరెక్టర్ సంతోష్ సోమవారం కాలనీని సందర్శించి క్షేత్రస్థాయిలో పరిశీలించారు. మాజీ కార్పొరేటర్ సింధు ఆదర్శ్ రెడ్డి విజ్ఞప్తి మేరకు చేపట్టిన ఈ పర్యటనలో పటాన్‌చెరు నియోజకవర్గ బీఆర్ఎస్ ఇన్‌చార్జి ఆదర్శ్ రెడ్డి పాల్గొన్నారు. ఈ సందర్భంగా బాంబే కాలనీలో ఇంటింటికీ వెళ్లి నీటి సరఫరా పరిస్థితిని పరిశీలించారు. తనిఖీల్లో భాగంగా బీడీఎల్ అపార్ట్‌మెంట్ సమీపంలో డ్రైనేజీ నీరు తాగునీటి పైప్‌లైన్‌లో కలుస్తున్న ప్రాంతాన్ని అధికారులు గుర్తించారు. ఈ సమస్యను తక్షణమే పరిష్కరించి, కాలనీ ప్రజలకు స్వచ్ఛమైన తాగునీరు అందేలా చర్యలు తీసుకోవాలని నాయకులు అధికారులను కోరారు.
అనంతరం రామచంద్రపురం డివిజన్ పరిధిలోని పాత రామచంద్రపురంలో జరుగుతున్న రెండు నీటి మరమ్మతు పనులను, వాసవి నగర్ కాలనీలోని అండర్‌గ్రౌండ్ డ్రైనేజీ (యూజీడీ) సమస్యను ఎగ్జిక్యూటివ్ డైరెక్టర్ పరిశీలించారు. ఆయా ప్రాంతాల్లో పెండింగ్‌లో ఉన్న పనులను త్వరితగతిన పూర్తి చేయాలని, ప్రజలు ఎదుర్కొంటున్న సమస్యలను వెంటనే పరిష్కరించాలని సంబంధిత అధికారులను ఆదేశించారు. కలుషిత నీటి సరఫరా వల్ల ప్రజల ఆరోగ్యానికి ముప్పు వాటిల్లే అవకాశం ఉన్నందున అధికారులు తక్షణమే స్పందించాలని నాయకులు సూచించారు. పైప్‌లైన్‌లోని లోపాలను సరిచేసి, నీటి సరఫరా వ్యవస్థను సురక్షితంగా పునరుద్ధరించడంతో పాటు, యూజీడీ సమస్యలను కూడా పరిష్కరించాలని కోరారు. ఈ పర్యటనలో జలమండలి డీజీఎం శివకుమార్, ఏఈ ధనుంజయ్ నాయక్ తదితర అధికారులు, బీఆర్ఎస్ సీనియర్ నాయకులు జగన్నాధ్ రెడ్డి, పరమేష్ యాదవ్, రామకృష్ణ తదితరులు పాల్గొన్నారు.